यशाचा
मंत्र
ज्येष्ठ सनदी अधिकारी बुरा व्यंकटेशम लिखीत ‘सेल्फी ऑफ सक्सेस’ ही कलाकृती
यशाचा मंत्र देणारी साहित्यिक मेजवानीच म्हणावी लागेल. सकारात्मक विचारांना चालना देवून
सदैव उत्तमोत्तम कार्यासाठी प्रेरीत करणारे हे पुस्तक यशाच्यादिशेने मार्गक्रमण करण्यास
दिशादर्शक ठरते. वाचकांना सक्सेस मंत्रा सांगणा-या पुस्ताकांच्या पठडीत व्यंकटेशम यांचे
हे पुस्तक आपली वेगळी ओळख निर्माण करणारी व उठून दिसणारी उत्कृष्ट कलाकृती असल्याची
अनुभूती देते.
‘सक्सेस बुक्स’ अर्थात
यश या विषयावर आतापर्यंत प्रकाशित पुस्तकांमध्ये आपल्या इच्छित गोष्टी प्राप्त करण्याबाबत आणि संपत्ती, समृध्दी, प्रतिष्ठा मिळविण्यासाठी प्रंसगी उद्योग साम्राज्य उभारण्यासाठी वा आयुष्यात
मोठे स्थान आदी मिळविण्यासाठी करावयाच्या नियोजनाबाबत भारंभार विचार दिसून येतात. तर,
काही फरकाने तुम्हाला आयुष्यात कोणत्याही गोष्टी मिळविण्यासाठी काय करावे व काय नये?
कसे वागावे व कसे नको? असे सल्ले वजा मार्गदशन सापडेल. मात्र, या पुस्तकात व्यंकटेशन
यांनी ३६० अंशामध्ये यशाचे गमक समजावून सांगितले आहे आणि तेच या पुस्तकाचे बलस्थानही
ठरले आहे. यश या संकल्पनेचे वैविद्यपूर्ण पैलू या पुस्तकात वाचकांच्या दृष्टीस पडतात
व नक्कीच ते मनाचा ठावही घेतात. आयुष्यात यश मिळविण्याचे ध्येय बाळगणा-या प्रत्येकालाच
हे पुस्तक वाचून यातील अकल्पनीय व वैशिष्टयपूर्ण आशय भुरळ घातल्याशिवाय राहत नाही.
यशाबाबतचे समग्र विचार
काव्यात्मक व तत्वज्ञानाच्या पध्दतीने आणि प्रवाही मांडणीद्वारे मांडण्यात आल्याने
हे पुस्तक वाचकांच्या मनाचा ठाव घेते. महत्वाकांक्षी
लोकांच्या आयुष्यात घडणारे यशाचे दुष्परीणाम व त्यातून जन्माला आलेले पापाचरण यावरही
या पुस्तकात भाष्य करण्यात आल्याने मूळ विषयाचा समतोल साधला गेला आहे. वास्तव जीवनातील निवडक कथा व उदाहरणांची पेरणी करून यशाचे
विविध पैलू या पुस्तकात उलगडून दाखविले आहेत.
एका अर्थाने यश म्हणजे काय? हे समजावून सांगणारा सर्वसामावेशी पैलुंचा गुच्छ असल्याची
अनुभूती वाचकाला या पुस्तकातून पदोपदी जाणवते. पुस्तकाच्या पहिल्या पानापासूनच वाचकांच्या
यश विषयक संकल्पनेच्या ज्ञानकक्षा रूंदावण्याचे कार्य लेखकाने नेटकेपणे केले आहे. कुठल्याही
क्षेत्रात यश मिळविण्यासाठी त्या क्षेत्राची इतंभूत माहिती करून घेण्याची जिजूविशा
असावी लागते. आणि स्वत: भारतीय प्रशासकीय सेवेसारख्या मानाच्या सेवेत कार्यकरताना लेखकाने
यशाचा बहुआयामी अभ्यास केल्याने, नव्हे-नव्हे त्यातूनच त्यांचे व्यक्तीमत्व घडत गेल्यानेच
, ‘आधी केले मग सांगितले’ या न्यायाप्रमाणे या पुस्तकातील प्रत्येक मुद्याचा आशय वाचकांच्या
हृदयाला भिडतो.
हे पुस्तक विविध बाबींमुळे
वैशिष्टयपूर्ण ठरते, त्यातील ठळक बाबी म्हणजे या पुस्तकात देश व जगातील नामांकित व्यक्तींच्या
आयुष्यातील किस्से मांडण्यात आले आहेत. पुस्तकात महात्मा गांधी ते एस्कोबर, जॅक मा ते रामोजीराव, ओप्रा विन्फ्रे ते मायकेल
जाक्सन यांच्या कथा अनुषांगिकरित्या व तितक्याच सहजरित्या वाचकांच्या भेटीला येतात.
या पुस्तकात आशय मांडणी करताना त्याची उत्तम विभागणी
करण्यात आली आहे. प्रत्येक प्रकरणात ठासून भरलेल्या कौशल्यपूर्ण शैलीतील माहितीमुळे
वाचक एकाचवेळी हे पुस्तक वाचू शकतात नाही तर टप्प्या टप्प्याने वाचन करू शकतात. अर्थात,
वाचकांची जिज्ञासा व आवड यांस हे पुस्तक पूर्ण न्याय देते. लेखकाने अगदी सहज सोप्या
भाषेचा उपयोग करून निर्मिलेली ही कलाकृती सर्वच स्तरातील वाचकांना सहजी आकलन होऊ शकते.
आकर्षक लेखनशैली ,वैशिष्टयपूर्ण
आशय मांडणी आणि सर्वसमावेशीदृष्टीकोणाचे हे पुस्तक वाचकांनी नक्की वाचले पाहिजे.
०००००
